Scaloni nuk e mbyll derën për ndryshime të tjera në skuadrën e Argjentinës pas dëmtimit të Balerdit

Argjentina ka përjetuar tashmë goditjen e parë në listën e saj për Botërorin 2026, pasi mbrojtësi Leonardo Balerdi u përjashtua për shkak të një dëmtimi në muskulaturën e soleus-it të këmbës së djathtë. Në konferencën pas ndeshjes kundër Hondurasit, trajneri kryesor Lionel Scaloni shpjegoi se “kur u ulja në konferencë dje, shpresoja që situata të mos ishte ajo që prisnim, por përfundimisht u konfirmua se Balerdi ka një problem në soleus dhe duhet të tërhiqet, pasi nuk përmbush kërkesat minimale për të ndihmuar ekipin, edhe në fazën grupore, dhe ishte shumë e rrezikshme”.

Dëmtimi i Balerdit e detyron Scaloni të rikthehet te lista paraprake prej 55 futbollistësh për të gjetur një zëvendësues në mbrojtje, por për momentin nuk është bërë asnjë zgjedhje e konfirmuar. Trajneri theksoi se situata e skuadrës nuk është në 100% për disa lojtarë dhe se mund të kërkohet ndërhyrje edhe për pozicione të tjera, jo vetëm për mbrojtësit qendrorë. “Nuk dua të shkaktoj alarm, por nuk jemi në formë të plotë me disa lojtarë, dhe ndoshta nuk përfshijnë vetëm mbrojtësit qendrorë. Do të presim”, tha ai.

Scaloni ka caktuar ndeshjen miqësore kundër Islandës më 9 qershor si afatin përfundimtar për vendimet, duke përfshirë zëvendësimin e Balerdit dhe çdo ndryshim tjetër të mundshëm. “Kemi një ndeshje tjetër për të vlerësuar nevojat e ekipit. Nuk do të marrim vendim para ndeshjes së hënë dhe do të shikojmë se si janë gjendjet e të tjerëve”, shtoi ai. Në këtë periudhë, edhe Lionel Messi ka përjetuar pak shqetësime, por ai, Nico Paz dhe Julián Álvarez kanë treguar përmirësim. Sipas gazetarit të TyC Sports, Gastón Edul, tre emra që po ngjallin shqetësime janë Nahuel Molina, Gonzalo Montiel dhe Leandro Paredes, të cilët nuk kanë mundur të stërviten para ndeshjes kundër Hondurasit dhe nuk janë përfshirë në bankën e rezervave. Molina dhe Montiel po përballen me çarje muskulare, ndërsa Paredes ka një çarje të lehtë muskulare nga loja e fundit në klub, duke e bërë atë shqetësimin më të madh për një vendim të ardhshëm në listën e Botërorit.